قصيدة نتحمل بقلم خراط الكلمات اشرف رمسيس

قصيدة نتحمل
بقلم خراط الكلمات اشرف رمسيس
نتحمل أد منتحمل
ويا بلدى حالفين هنكمل
من فوق الصعاب هنعدى
وبطول الطريق لو طول
انا بلدى هشيلها فى عينى
لو حتى راح أمشى لوحدى
لو أعيد الطريق م الأول
راح ابنى كرامة بلدى
وبقول الضمير فى الأول
راح اجنى شبابك ولدى
لو صح العلام فى الأول
عشان يا بلدى نبنى لازم نهد
قبل أما نعلى نعمل اساس ونمد
وإحنا بنحسب لازم نعد
المسألة مش سلق بيض
او بيضة فقصت تانى يوم هتبيض بجد
دا كل مجد لازملو وقت
وإحنا البلد فى وقت حرب
على الفساد والوضع كرب
والغلابه منداسين والحالة صعب
فوقهم رجول الطماعين وكل كلب
ابن كلب
احنا دولة بتتبنى عمرك يا مصر متنحنى
والشعب فيها قوته فوق اى حد
انا نفسى نبنى ونتبنى على حب بعض
انا شعبك يا بلدى يهمنى
شعب الرجال ابو قلب صلب
عبر القنال بعد الهزيمة والإحتلال
والمية دوبت الرمال بإيدينا حققنا المحال
تعظيم سلام يا خير جند وأغلى شعب
دا النيل رواه من احلى نهر جاب معاه
سر الحياه احلى مياه وشرابه عزب
يبقى عشان كل الإيادى تتملى
نصدق الحلم اللى عشنا فى يوم عليه
وأكل عشنا نحفظوا نحافظ عليه
وندوس بقى على كل صعب
إصرار عزيمة لا تنهزم وقت الهزار
عدى وطار والجد جد شغل دماغك
ليل نهار خلى عزيمتك نور ونار
تلقى المرار أصبح بخار والعمار
بدل الدمار إكتب حكايتك قصتك
يا اغلى شعب ربك حماك فى بلوتك
بارك خطاك لما ذادت شكوتك
حوط عليك صانك ورفعك فوق عداك
والشيطان غلبو الملاك
والرب كان واقف معاك صانك حماك
واللى فكر انو صادك لما جه ووقف أصادك
وحده واقع فى الهلاك زى السمك جوى الشباك