(لما البلية تلعب )
خطي بقدمك وأوعي تلين
وحاسب نفسك
قبل ما تبقي عجين
ولما تخطي نادي مولاك
واعلي بصوتك وقول يا معين
عمره الحق ما تجيبه سكين
فيك ك عيون شايلها راسك
بص بعينك وابقي فطين
خلي بصيرتك للمعدول
واللي يطاطي لازم يغور
بكره هايفني ولازم يزول
آه لو قادر يعمل غول
لعب البلية وصار مغرور
عبا جيوبه لب وفول
وساب التوك توك والحنطور
جاب الفرنا والمرسيدس
وبعد الظهر ركب الفور
قلع البدله وشال العمة
وسك عمارة عشرين دور
كانت العملة ما تعرف جيبه
ولما عرفها كان مسطول
ولما تجيله يخاف يمسكها
وكل ما تقرب يدهش منها
يا خد غفلة ويشم ريحتها
ويحضن فيها زى عشيقته
ولما تفارقه يبات مهموم
بليه ولعبت وجابت زهور
وجات المركب بالمحمول
تصعد منها ريحة الكور
مين يتكلم مين يقول
واللي بيشهد شاهد زور
دستور ....!
من غير تعويذة يجي شمهور
يطفي اللمبة وعاشق الضلمة
كل حياته من غير نور
جايز يطلع جن يثور
أو تور صغير ليه قرون
حاجه تحير لب الواحد
لما الباطل ربا جذور
وصبح الحق في الدنيا يقاسي
وتطلع روحه وجلده نسور
والمسكين وكلاه الدنيا
نازل يدور علي قرشين
ساكن في بيته الله أعلم
وفوق القبة غراب البين
ويفضل يجري زى طاحونة
ويعصر جسمه زى ليمونة
ويقدح راسه في الجدران
والغلبان وكلاه النار
حتى عينيه ما عادت شايفه
ومن اعصابه ما قادر يقوم
مهما راح أو هب وقب
يفضل عرضه ودنيته سد
ليه نحتد
خطي برجلك وأوعي تلين
وخلي الخطوة ليها سكين
واللي يعوقك حطه في بير
مهما إن قالوا أنت متين
لو كان صاحبك عنده ضمير
وأخذك صاحب وبقي قرين
كل الناس صاور شياطين
ولما اللية بتلعب تدي
ولما بتدي بتدي كتير
ساعتها :
يبقي الأعمي ساعاتي
والجربان يلبس قفاطين
بقلم : سيد يوسف مرسي
الرئيسية 
