ليه التنمر // هجائية عامية

كان ليه التنمر

واديك بتشرب من نفس الكاس
و بقيت ماشي من غير لباس
أكرع يا حبيبي كاسك واشرب
لو كنت تفكر ما بقيت محتاس
دا الروح زهقت جواك ومخبي
وبتعوي وملاقي جواك أنفاس
وبقيت خرده ع الأرض مرماية
لا تضمك حفنه ولا تتعبا ف اكياس
والفرجه صبحت للخلق عاديه
بيحبك كلب وقطه ونسناس
وتغرك ضحكة معتوه يضحكه
عايش طول عمره زيك حلاس
وبتعصر كبدك ومصارينك
مين كدك ابقيت للخلق مداس
والحسره في قلبك جهنم متقاده
والدمع في عينك كداس
وبقيت خالي وفاضض ريشك
ما ترص رغيف ولا فيك احساس
وبقيت تتسول من الخلق البسمة
ولا عاد خدك اليوم ينياس
والنوح مصاحبك من كتر القهر
وضيعت الصحبه والصاحب
والمولد فض بمراجيحه
روح رتل اشعارك في المدبح
لا بقيت قسيس ولا لاحق شماس
خليتني افكر في امورك واستغرب
من بعد العزه عايش محتاس
روح جر كلابك واحبسهم واقعد
ولا واحد قابلك غير النحاس
كان ليه تتنمر على خلقه
ما الكل بيكتب وبيشعر
والناس بتحب الحساس

بقلم : سيد يوسف مرسي