@@@@@@
مراتي ]
قالوا : مراتـــــــي ليه نكدية
قلت : يا نـــــــاس هيه نقية
قلبها أبيــــــض وزى الـــفل
واسعة وبارحــه وليها تكية
***
قالوا :عجيبة مِرات الشاطر
قالعه براسها وعامله قناطر
واللي يشوفها يتوه فالخاطر
حرمه يا رب وليها شنبات
*****
قلت : كفاية
ورحت أدندن وألف رحاية
عارف إن اللف حكــــــاية
جايز تطحن وتخر دقــيق
وجايز ما تطحن ولا حباية
*****
وأدي الحكاية :
أصل مراتي يا ناس عصبية
قط منفر من العـــــــــصرية
عامله ضوافر تهبش بيهم
وإن ضحكتلي غاوية أذية
*****
أصل مرأتي جحيم مستورد
لما بتصحى نورهـــــا يورد
واللي لابسها جن مــــصور
ساكن راسها وباني حجرات
*****
لما أروح بعــــــــــــد غيابي
أكتم نفسي وأعـــــد حاجاتي
وأرسم بسمة عشان أبسطها
وأفرغ جيبي من عمـــــلاتي
*****
أغمض عيني وأمكن أعدي
وأرفع راية لسيدنا الأفندي
وإن بصتلي أطاطي براسي
جايز تغضب وتكسر باسي
وتزلني لسابـــــــــع أرض
*****
وانزل ساكــــت قدام ولدي
وأخد علقــــة تقصر أجلي
وامسك دمعي وأخاف يجري
وأضحك ضحكة بسني وتغري
*****
أدي مراتي
يجي الليل وأفضـــــــل أعوذ
أقرى الفاتحة وآية الكرسي
وأدعي المــولى أنه يأخدها
قبل الصبح ما يجي واشوفها
وأخد نفـــــسي زى الناس
*****
أحط دماغي وأحلم بيها
تبقى مصيبة لو نامت قبلي
تفتح بوقها وطبلها يدوي
معركة دايرة ولها صولجان
*****
انسحاب
أحلم أن إني ركبت حصان
ومسكت لجامه وسبت حمار
قبل ما تصحي أو توعالي
وأخرج سالم من بلاويها
بس مراتي
أم عيالي
فين تروح
ومين يؤيها
********
منولوج شعبي فكاهي بلهجة أفهل الصعيد بمصر [
بقلمي @سيد يوسف مرسي